未來是充滿神秘的
你明知廟街的江湖術士的說話一定係空泛大包圍
你依然都會去奉上金錢去偷窺一下未來
我，又去了廟街一轉
先講年初前同兩位姊妹的睇相經歷
我的兩位姊妹對塔羅無興趣，比較想睇相
所以就分別光顧兩間中年近老年的呀叔
第一位是白髮呀叔，全程只是不停講因為猴年有驛馬星
所以就會有轉變（沒有說什麼轉變）
而我們最深刻的就是呀叔不停地稱呼我朋友但沒有說下去
簡單來說，佢同麥玲玲在無記新春節目講十二生肖運勢是沒分別
第二位是聲稱在廟街打滾了二十多年的呀叔
這位呀叔有認真望望你的相面，作出少許評價
之後又睇掌相，睇你遇到幾多位男人及幾時結婚
不過我同朋友全部都廿六七歲結婚，全部都得兩三個
所以都係空泛的，不過呀叔比較真誠，一百蚊都可以的
今天因為想知道幾時搵到工，所以都去問問神明
七點到廟街都只有大約一半檔鋪開了
最後我選擇了有一檔應該是新的塔羅，一位年輕頗美的女占卜師Anna
（因為男友拒絕到年長的，而好評那位美女）
檔口沒有banner沒有與明星的相片，只有黑色的布和一座香薰在桌上
$120一條大問題，無限細問題不加錢
在每次抽牌掀牌，Anna都會解釋牌的意思
我比較喜歡佢同番我講究竟我抽左咩牌出黎
例如我問究竟我做xxx好嗎？抽了三隻牌出黎然後Anna話隻牌係金幣，代表搵到錢
佢的占卜方法比較簡單，而我都容易明白，所以我評價頗高
希望如Anna所言，我真係可以搵到錢，哈哈！
